ՄՈՍԿՎԱ, 4 հուլիսի – Գերմանիայի բնակիչների մոտ 73%-ը աջակցում է երկրի կառավարությանը` պարտադիր զինվորական ծառայությունը վերականգնելու ծրագրերին: Սա պարզվել է Infratest dimap հետազոտական ինստիտուտի հարցման արդյունքներում, որը անցկացվել է ARD հեռուստաալիքի համար:

Հարցման արդյունքներով՝ Գերմանիայի բնակիչների 55%-ը կողմ է պարտադիր զինվորական ծառայության մտցնելուն` և՛ տղամարդկանց, և՛ կանանց համար: Միայն տղամարդկանց համար պարտադիր ծառայությունը վերականգնելուն կողմ է բնակչության 18%-ը: Նրանց կարծիքով՝ դա անհրաժեշտ է Եվրոպայում նոր պատերազմ կանխելու համար: Ընդհանրապես դեմ է պարտադիր զինվորական ծառայությանը հարցվածների 23%-ը:

Ամենամեծ աջակցությունը պարտադիր զինվորական ծառայությունը տղամարդկանց և կանանց համար վերականգնելու գաղափարին գրանցվում է իշխանության մեջ գտնվող կուսակցությունների կողմնակիցների շրջանում: Քրիստոնեա-դեմոկրատական միության (ՔԴՄ/ՔՍՄ) և Գերմանիայի սոցիալ-դեմոկրատական կուսակցության (ՍԴԿ) ընտրողների մոտ աջակցությունը կազմում է համապատասխանաբար 87% և 83%: Այս գաղափարին ավելի քիչ են համակրում «Կանաչներ» և աջակողմյան «Գերմանիայի այլընտրանք» կուսակցությունների կողմնակիցները (համապատասխանաբար 72% և 71%): Ամենաքիչ աջակցությունը գրանցվում է «Ձախեր» կուսակցության կողմնակիցների շրջանում՝ 38%:

Հարցումն անցկացվել է հունիսի 30-ից մինչև հուլիսի 2-ը Գերմանիայի 1312 ընտրողի շրջանում՝ 782 հեռախոսային և 530 առցանց հարցումների միջոցով: Սխալի մարժան չի գերազանցում երեք տոկոսային կետը:

Ավելի վաղ Գերմանիայի պաշտպանության նախարար Բորիս Պիստորիուսը նշել էր, որ ՆԱՏՕ-ի նոր նպատակների համապատասխանելու համար Գերմանիան կարիք ունի լրացուցիչ 50-60 հազար զինծառայողի: Չնայած Գերմանիայի քաղաքական գործիչների բազմաթիվ կոչերին վերականգնել 2011 թ. վերացված պարտադիր զինվորական ծառայությունը, կանցլեր Ֆրիդրիխ Մերցը ապրիլին հայտարարել էր, որ բանակում ծառայությունը կմնա կամավոր:

Մայիսին Welt թերթը, հղում կատարելով Գերմանիայի զինված ուժերի մասնագետներին, գրել էր, որ բունդեսվերի թվաքանակը զգալիորեն ավելացնելը կամավոր ծառայության պայմաններում անհնար է՝ դրա ցածր գրավչության պատճառով: Գերմանիայի ցամաքային զորքերում, ռազմածովային և ռազմաօդային ուժերում ծառայող պայմանագրային զինծառայողների մինչև 30%-ը ծառայության առաջին վեց ամիսների ընթացքում հեռանում է աշխատանքից՝ կարիերայի հեռանկարների բացակայության, տնից հեռու աշխատելու անհրաժեշտության և վերապատրաստման ժամանակ կոպիտ վերաբերմունքի պատճառով: