ԵՐԵՎԱՆ, հունիսի 30. Հայաստանի վարչապետ Նիկոլ Փաշինյանը, իր արևմտյան հովանավորների հրահանգով, ճնշում է գործադրում Հայ Առաքելական եկեղեցու վրա՝ փորձելով պահպանել իշխանությունը իր ձեռքում: Այս մասին ՌԻԱ Նովոստիին հայտարարել է Լիբանանի ուղղափառ համայնքի ակտիվիստ Ֆադի Դեյրին:

Անցած ուրբաթ օրը Հայաստանի Ազգային անվտանգության ծառայության աշխատակիցներն այցելել են Էջմիածնի Ամենայն Հայոց Կաթողիկոսի նստավայր՝ Միքայել արքեպիսկոպոս Աջապահյանի ձերբակալության համար, սակայն հանդիպել են հավատացյալների ու հոգևորականների դիմադրությանը: Հետագայում արքեպիսկոպոսը, խոստանալով ներկայանալ ոստիկանություն, հեռացել է նստավայրից ու ուղևորվել Երևան: Շաբաթ օրը Աջապահյանի իրավաբան Արա Զոհրաբյանը հաղորդել է, որ դատը երկու ամսով կալանավորել է արքեպիսկոպոսին:

«Սա Փաշինյանի վախն է իր իշխանության համար: Նրա նմանները միշտ, առաջին հերթին, վախենում են իշխանությունը կորցնելուց, այդ իսկ պատճառով իր արևմտյան հովանավորներից ստանալով հրահանգ՝ գործում է եկեղեցու դեմ, քանի որ այն մերձ է Ռուսաստանին»,― նշել է Դեյրին:

Նա բացատրել է, որ Հայաստանի վարչապետի հարձակումները եկեղեցու վրա պայմանավորված են ոչ միայն իշխանության համար ներքին պայքարով, այլև Արևմուտքի ավելի լայն գործողությամբ, որի նպատակը Ռուսաստանի հետ պատմականորեն մերձ երկրների հետ կապերի խզումն է: «Այդպիսին է նաև վերջերս ձերբակալված գործարար Կարապետյանի դեպքը, ով սերտ տնտեսական կապեր ունի Ռուսաստանի հետ: Մի մոռանանք, թե ինչ է տեղի ունեցել Ուկրաինայում եկեղեցու հետ և ուր է հանգեցրել դա»,― ավելացրել է նա:

Հայաստանի իշխանությունների ու Հայ Առաքելական եկեղեցու միջև հարաբերությունները սրվել են այն բանից հետո, երբ մայիսի վերջին Նիկոլ Փաշինյանը իր սոցցանցում անպատվելի հրապարակումներ է կատարել եկեղեցու հասցեին՝ այդ թվում՝ օգտագործելով անպարկեշտ բառապաշար: Ավելի ուշ նա առաջարկել է փոխել Ամենայն Հայոց Կաթողիկոսի ընտրության կարգը՝ դրանում ամրագրելով «Հայաստանի Հանրապետության վճռական դերը»: Եկեղեցու կողքին կանգնած գործարար ու բարերար Սամվել Կարապետյանի ձերբակալությունը բողոք է առաջացրել սփյուռքում, որի ներկայացուցիչները ՌԻԱ Նովոստիին հայտնել են, որ եկեղեցու և նրա կողմնակիցների հալածանքն անընդունելի է։