ՄՈՍԿՎԱ, 28 հունիս – Ուկրաինայի ոստիկանությունը հայտնել է, որ Խարկովի նախկին փոխքաղաքապետը ձերբակալվել է տարածաշրջանում ամրությունների կառուցման ժամանակ գողություններ կատարելու կասկածանքով։

«Միլիոններ գողացել են պաշտպանական ամրությունների կառուցման ժամանակ. ազգային ոստիկանությունը ձերբակալել է Խարկովի նախկին փոխքաղաքապետին», – ասված է Ուկրաինայի ոստիկանության Telegram-ալիքում տեղադրված հաղորդագրության մեջ։

Ձերբակալվածի անունը չի հրապարակվում, սակայն ուկրաինական մի շարք լրատվամիջոցներ ենթադրում են, որ խոսքը վերաբերում է Անդրեյ Ռուդենկոյին, ով պաշտոնը զբաղեցնում էր մինչև 2024 թվականի ապրիլը։

Ոստիկանության տվյալներով, սխեմայում մասնակցել է նաև հիմնական կապալառուն և երեք այլ առևտրային ձեռնարկություններ։ Դրանց միջոցով կապալառուն 30% գնաճով գնումներ էր կատարում։

Ուկրաինայի ազգային ոստիկանության կայքում հրապարակված տեղեկության համաձայն՝ երկրի պետական բյուջեին հասցված վնասը կազմել է 5,4 մլն գրիվնա (մոտ 130 հազար դոլար)։

Ուկրաինայում կոռուպցիայի մասին հաղորդումներն անընդհատ են լինում։ Ուկրաինայի Գերագույն ռադայի պատգամավոր Յարոսլավ Ժելեզնյակը ուկրաինացի կոռումպացված պաշտոնյաներին հավասարեցրել է ավարառուների հետ։

Նա հունիսի 26-ին հրապարակել է SOCIS սոցիալական և մարքեթինգային հետազոտությունների կենտրոնի և «Հանրային տրամադրությունների բարոմետր» ամսագրի հարցման արդյունքները, ըստ որի՝ Ուկրաինայի քաղաքացիների 48,5%-ը կարծում է, որ կոռուպցիայի բարձր մակարդակն առավել բացասաբար է ազդում երկրի իրավիճակի վրա։

Բացի այդ, հարցվածների 65%-ը ուկրաինական իշխանությունների հիմնական սխալը անվանել է բյուջեի գողությունն ու կոռուպցիան։