Մի շարք ավտոմեքենաներից գողությունների դեպքեր են գրանցվել Երևանում։ Ըստ տեղեկությունների՝ հունիսի 25-ին, ժամը 08:55-ին, Հայաստանի Ներքին գործերի նախարարության ոստիկանության Կենտրոնական բաժինն ընդունել է դիմում Պուշկինի 60 հասցեում տեղի ունեցած գողությունների վերաբերյալ։

Ոստիկանության ստուգումների արդյունքում պարզվել է, որ հունիսի 24-ի երեկոյան ժամը 23:00-ից մինչև հաջորդ օրվա առավոտյան ժամը 08:50-ն ընկած ժամանակահատվածում անհայտ անձինք գողացել են.

• Երևանում բնակվող 32-ամյա Անի Ս.-ին պատկանող «Mazda» մակնիշի մեքենայի կողային հայելիների զույգ ապակիները,
• նույն հասցեում կայանված Արագածոտնի մարզի 40-ամյա Արման Հ.-ին պատկանող «BYD» մակնիշի ավտոմեքենայի հայելիների ապակիները,
• Երևանում բնակվող 66-ամյա Ալլա Թ.-ին պատկանող «Nissan» մակնիշի մեքենայի կողային հայելիները:

Իրադարձությունները նյութական վնաս են պատճառել տուժողներին։ Գործին վերաբերող փաստաթղթերն ուղարկվել են Հայաստանի Հանրապետության քննչական կոմիտեի Երևանի քննչական վարչության Կենտրոն և Նորք-Մարաշ վարչական շրջանների քննչական բաժիններ։

Հիշեցնում ենք՝ օրենքով ցանկացած կասկածյալ կամ մեղադրյալ համարվում է անմեղ, քանի դեռ նրա մեղքը վերջնականապես ապացուցված չէ դատարանի կողմից օրինական ուժի մեջ մտած դատավճռով։