ՄՈՍԿՎԱ, 27 հունիս – ԱՄՆ-ի Թենեսի նահանգի Հանրապետական կուսակցության կոնգրեսմեն Էնդի Օգլըսը կոչ է արել զրկել ԱՄՆ քաղաքացիությունից և արտաքսել Նյու Յորքի քաղաքապետի թեկնածու Զոհրան Մամդանուն, ով Դեմոկրատական կուսակցությունից է: Մամդանին չորեքշաբթի գիշերը անսպասելիորեն առաջ անցավ Դեմոկրատական կուսակցության նախնական ընտրություններում՝ հաղթելով իր հիմնական մրցակցին՝ նախկին նահանգապետ Էնդրյու Կուոմոյին: Վերջին տվյալներով՝ Մամդանին հավաքել է ձայների 43,5%-ը, իսկ Կուոմոն՝ 36,4%:

ԱՄՆ նախագահ Դոնալդ Թրամփը քննադատել է Մամդանուն՝ նրան անվանելով «ոչ շատ խելացի» խենթ կոմունիստ:

Էնդի Օգլըսը սոցիալական ցանցերում գրել է. «Զոհրան «Փոքր Մուհամմեդ» Մամդանին հակասեմիտ է, սոցիալիստ ու կոմունիստ, ով կոչված է կործանելու Նյու Յորքի մեծ քաղաքը: Նրան պետք է արտաքսել: Ահա թե ինչու ես կոչ եմ անում սկսել նրա դեմ քաղաքացիությունից զրկելու գործընթացը»:

Օգլըսը իր գրառմանը կից տեղադրել է ԱՄՆ գլխավոր դատախազ Պամելա Բոնդիին ուղղված նամակը, որտեղ նշված է, որ, լրատվամիջոցների տվյալներով, Մամդանին ԱՄՆ քաղաքացիություն ստանալուց առաջ աջակցել է Holy Land Foundation կազմակերպությանը: 2008 թվականին այդ կազմակերպության հինգ ղեկավարներ դատապարտվել էին ՀԱՄԱՍ-ին նյութական աջակցություն ցույց տալու համար, որն ԱՄՆ-ում համարվում է ահաբեկչական:

Սակայն Օգլսի կոչը բացասական արձագանք առաջացրեց դեմոկրատների շրջանում: Մասնավորապես, կոնգրեսմեն Շրի Թանեդարը և Ներկայացուցիչների պալատի Ներքին անվտանգության կոմիտեն մեղադրեցին Օգլսին ռասիզմի մեջ:

Զոհրան Մամդանին ծնվել է Ուգանդայում՝ հնդկական ծագում ունեցող ընտանիքում: Յոթ տարեկանում ծնողների հետ տեղափոխվել է Նյու Յորք:

Նյու Յորքում կիրառվում է վարկանիշային քվեարկություն, և քանի որ հավանաբար թեկնածուներից ոչ մեկը չի հավաքի 50%-ից ավելի, ձայների հաշվարկը կշարունակվի փուլերով: 33-ամյա Մամդանին, եթե հաղթի, կդառնա Նյու Յորքի առաջին մուսուլման քաղաքապետը: