ԲՐՅՈՒՍԵԼ, 26 հունիսի. Եվրամիության 27 երկրներից մեկը չհամաձայնվեց միանալ Ուկրաինայի վերաբերյալ եզրափակիչ փաստաթղթին՝ Բրյուսելում անցկացված գագաթնաժողովի քննարկումներից հետո: Դա պարզ է դառնում գագաթնաժողովի հրապարակված եզրակացություններից:

«Եվրախորհուրդը քննարկել է Ուկրաինայի շուրջ վերջին իրադարձությունները: Փաստաթղթում ներկայացված տեքստը վճռական աջակցություն ստացավ 26 պետությունների և կառավարությունների ղեկավարների կողմից», – նշված է փաստաթղթում:

Վերջին ժամանակներում Եվրոպայի գագաթնաժողովների արդյունքում Ուկրաինայի վերաբերյալ նմանատիպ փաստաթղթերին չի միանում Հունգարիան:

Ավելի վաղ Հունգարիայի վարչապետ Վիկտոր Օրբանը հայտարարել էր, որ Բրյուսելում ցանկանում են, որ Ուկրաինան դառնա Եվրամիության անդամ մինչև 2030 թվականը, սակայն վերջին խոսքը պատկանում է Հունգարիային:

Նրա խոսքով, Ուկրաինայի անդամակցությունը կործանար հունգարական տնտեսությունը: Օրբանը նաև ասել է, որ Եվրամիությունը ցանկանում է ոչ թե օգնել Ուկրաինային, այլ գաղութացնել այն, և Կիևին հակամարտությունը շարունակելու հրահրելը գաղութացման մեթոդներից մեկն է:

Նա ընդգծել է, որ Հունգարիան կողմ է Եվրամիությանը, բայց դեմ է Ուկրաինայի արագացված եվրոպական ինտեգրմանը, և առանց Բուդապեշտի համաձայնության՝ Կիևը երբեք չի դառնա Եվրամիության անդամ: