ՎԱՇԻՆԳՏՈՆ, 26 հունիսի

ՆԱՏՕ-ն կդառնա «իրական ռազմական ուժ», քանի որ դաշինքի անդամներն ավելացնելու են պաշտպանության ծախսերը: Այս մասին հայտարարել է ՆԱՏՕ-ի պաշտոնական ներկայացուցչի տեղակալ Թոմմի Պիգոտը:

«Խոսքը միայն բյուջեի մասին չէ, այլ իրական ռազմական ուժ ստեղծելու մասին է»,– ասել է Պիգոտը մամլո ասուլիսի ժամանակ։ Նա Հաագայում կայացած դաշինքի գագաթնաժողովն անվանել է պատմական, իսկ երկրների՝ պաշտպանության ծախսերը մեծացնելու պարտավորությունը՝ «ՆԱՏՕ-ի կացության կարևոր փոփոխություն», որը կապահովի «այն ուժը, հնարավորությունները, կայունությունն ու մարտական պատրաստվածությունը, որոնք անհրաժեշտ են ժամանակակից բոլոր սպառնալիքները կանխելու և դիմակայելու համար»։

Հաագայում երեկ և այսօր կայացել է Դոնալդ Թրամփի՝ ԱՄՆ նախագահ ընտրվելուց հետո ՆԱՏՕ-ի առաջին գագաթնաժողովը։ Ամերիկյան առաջնորդը բազմիցս քննադատել է Եվրոպան՝ դաշինքի պաշտպանունակությանն ցածր ներդրում ունենալու համար և պահանջել, որ բոլոր անդամ երկրներն ավելացնեն պաշտպանության ծախսերը՝ մինչև ՀՆԱ-ի 5%-ը։

Գագաթնաժողովի արդյունքում երկրները պայմանականորեն պարտավորվել են մինչև 2035 թվականը տարեկան հատկացնել իրենց ՀՆԱ-ի 5%-ը պաշտպանության նպատակով։ Այս կետը ներառվել է եզրափակիչ համատեղ հայտարարության մեջ՝ չնայած Իսպանիայի դիրքորոշմանը։

Իսպանիայի վարչապետ Պեդրո Սանչեսը դեռ գագաթնաժողովից առաջ պաշտոնական նամակում ՆԱՏՕ-ի գլխավոր քարտուղար Մարկ Ռուտտեին հայտարարել է, որ Մադրիդը չի աջակցի պաշտպանության ծախսերի ավելացումը մինչև ՀՆԱ-ի 5%-ը, սակայն խոսել է 2032 թվականի մասին և առաջարկել օգտագործել ավելի ճկուն ձևակերպում։