Տեհրան, հունիսի 25. Իրանի մայրաքաղաքում համերգ է տեղի ունենում՝ նվիրված, ինչպես Իրանը հայտարարել է, Թեհրանի «հաղթանակին», որն «ստիպել» է Իսրայելին համաձայնել հրադադարի: Իրանի համաշխարհային հռչակ վայելող մաէստրո Նասեր Ղեյդարյանը ելույթ է ունենում Ազադի հրապարակում:

Երեքշաբթի օրը Իրանի մայրաքաղաքում հանրահավաք է եղել՝ ի աջակցություն երկրի զինված ուժերի, այն բանից հետո, երբ հայտնի է դարձել Թել Ավիվի և Թեհրանի միջև ռազմական գործողություններում հրադադարի մասին:

Իսրայելը հունիսի 13-ի գիշերը ռազմական գործողություն սկսեց Իրանի դեմ՝ մեղադրելով վերջինիս գաղտնի միջուկային ռազմական ծրագրի մեջ: Օդային հարվածների և դիվերսիոն խմբերի գործողությունների թիրախներ դարձան միջուկային օբյեկտները, ինչպես նաև զինվորական առաջնորդներ, միջուկային ֆիզիկոսներ և ավիաբազաներ: Իրանը մերժել է մեղադրանքները և պատասխանել է հարձակումներով:

12 օր շարունակ կողմերը փոխանակել են հարվածներ, որին միացել են նաև ԱՄՆ-ն՝ հունիսի 22-ի գիշերը Իրանի միջուկային օբյեկտների վրա մեկանգամյա հարված հասցնելով:

Որպես պատասխան՝ հունիսի 23-ի երեկոյան Թեհրանը հրթիռակոծել է ԱՄՆ-ի ալ-Ուդեյդ բազան Կատարում՝ հաղորդելով, որ իրանական կողմը չի պատրաստվում հետագա էսկալացիայի:

ԱՄՆ նախագահ Դոնալդ Թրամփը դրանից հետո հայտարարել է, որ հուսով է, թե Կատարի ամերիկյան ռազմակայանին հասցված հարվածով Իրանը «ազատվել է լարվածությունից» և այժմ հնարավոր է խաղաղության ճանապարհը Մերձավոր Արևելքում: Նա նաև նշել է, որ Իսրայելը և Իրանը համաձայնություն են ձեռք բերել զինադադար կնքելու վերաբերյալ, որը 24 ժամվա ընթացքում պետք է դառնա «12-օրյա պատերազմի պաշտոնական ավարտ»: