ԱՆՔԱՐԱ, 25 հունիս. Թուրքիայի նախագահ Ռեջեփ Թայիփ Էրդողանը հայտարարել է, որ իր՝ ԱՄՆ նախկին նախագահ Դոնալդ Թրամփի հետ ունեցած հանդիպման ժամանակ չի քննարկվել Թուրքիայի կողմից Ռուսաստանից ձեռք բերված S-400 զենիթահրթիռային համալիրների հարցը: Ըստ նրա՝ «այս հարցը փակված է»:

«Մենք Թրամփի հետ հանդիպման ժամանակ S-400-ի մասին չենք խոսել: Այս հարցը մեր օրակարգում չկա: Այն փակված է: Մենք քննարկել ենք F-35-ի հարցը: Մենք F-35-ի համար վճարել ենք 1 միլիարդ 300 միլիոն դոլար: Մենք տեսանք, որ Թրամփը դրական տրամադրված է F-35-ի գնման վերաբերյալ: Մեր գործընկերները, որոնք պատասխանատու են F-16-ի սպասարկման ու վերանորոգման, ինչպես նաև F-35-ի գնման համար, շարունակում են իրենց աշխատանքը: Մենք նաև շարունակում ենք համագործակցությունը Մեծ Բրիտանիայի և Գերմանիայի հետ Eurofighter կործանիչի վերաբերյալ: Գերմանիան ու Մեծ Բրիտանիան դրական են գնահատում մեր պատրաստակամությունը»,– ասել է թուրք նախագահը Հաագայում մամուլի ասուլիսի ժամանակ:

2017 թվականին Թուրքիան Ռուսաստանի հետ պայմանագիր կնքեց S-400 զենիթահրթիռային համալիրների մատակարարման վերաբերյալ, որոնք ստացվեցին 2019 թվականի ամռանն ու աշնանը: ԱՄՆ-ն պահանջում էր հրաժարվել ռուսական համակարգերից և գնել Patriot-ները, սակայն Անկարան մերժեց: Որպես պատիժ՝ Վաշինգտոնը Թուրքիան հանեց F-35 կործանիչների մատակարարման ծրագրից և սանկցիաներ սահմանեց երկրի պաշտպանական արդյունաբերության ղեկավարների դեմ՝ օգտագործելով CAATSA օրենքը («Ամերիկայի հակառակորդներին սանկցիաների միջոցով հակազդելու մասին»):

ԱՄՆ-ն նաև չեղյալ հայտարարեց F-35-ի վերաբերյան համատեղ հուշագիրը Թուրքիայի հետ և այն ստորագրեց ծրագրի մնացած յոթ գործընկերների՝ Մեծ Բրիտանիայի, Իտալիայի, Նիդերլանդների, Ավստրալիայի, Դանիայի, Կանադայի և Նորվեգիայի հետ: