ՄՈՍԿՎԱ, 25 հունիս. Առավոտյան Իսրայելի հարվածների հետևանքով Գազայի հատվածում զոհվել է ավելի քան 20 պաղեստինցի, այդ թվում՝ 6 մարդ՝ մարդասիրական օգնության բաշխման կենտրոնների մոտ։ Այդ մասին հայտնում է Al-Jazeera հեռուստաալիքը՝ հղում անելով պաղեստինյան բժշկական աղբյուրներին։

«Չորեքշաբթի առավոտյան Իսրայելի հարվածների հետևանքով Գազայում զոհվել է 22 մարդ, այդ թվում՝ 6 մարդ, ովքեր սպասում էին մարդասիրական օգնության բաշխմանը», – հայտնել են աղբյուրները։

Տվյալներով՝ մայիսի 27-ից ի վեր մարդասիրական օգնության բաշխման կետերի մոտ Իսրայելի զինված ուժերի կրակի հետևանքով զոհվել է 516 խաղաղ բնակիչ, մոտ 4 հազարը վիրավորվել է, իսկ 39 մարդ անհետ կորած է համարվում։

Մայիսին Իսրայելի իշխանությունները, ռազմական գործողությունների զգալի ընդլայնման ֆոնին, նոր ծրագիր հայտարարեցին Գազայի հատվածի բնակիչներին մարդասիրական օգնություն հասցնելու վերաբերյալ։ Ըստ ծրագրի՝ օգնությունը բաշխվում է այն տարածքներում, որոնք մաքրված են ՀԱՄԱՍ շարժման ներկայությունից, որի անդամներին նախկինում մեղադրել են մարդասիրական օգնության կողոպտման մեջ։

ՄԱԿ-ի Պաղեստինյան փախստականներին օգնության Մերձավորարևելյան գործակալության գլխավոր կոմիսար Ֆիլիպ Լազարինին ավելի վաղ հայտարարել էր, որ Իսրայելի՝ Գազա մարդասիրական օգնության մատակարարումները վերսկսելու ծրագիրը նպատակ ունի պաղեստինյան բնակչությանը բռնի տեղահանել այդ տարածքից։

ՀԱՄԱՍ-ը հայտարարել է, որ Իսրայելի ստեղծած Գազայում մարդասիրական օգնության բաշխման մեխանիզմը ձախողվել է և վերածվել թակարդի, որը ենթարկում է խաղաղ բնակչությանը վտանգի։