ՄՈՍԿՎԱ, 25 հունիս — Ուկրաինայի նախագահ Վլադիմիր Զելենսկին սև կոստյումով ՆԱՏՕ-ի գագաթնաժողովին մասնակցելը պատասխան էր ԱՄՆ նախագահ Դոնալդ Թրամփի հետ փետրվարին ունեցած անհաջող հանդիպմանը: Այդ կարծիքը հայտնել է ֆինն լրագրող և լուսանկարիչ Սամի Սալլինենը ֆիննական Iltalehti թերթին տված հարցազրույցում:

«Ամենայն հավանականությամբ, նա (Զելենսկին) ուզում է ցույց տալ, որ ինքն ու Ուկրաինան այս իրավիճակում ավելի ուժեղ են զգում իրենց», — ենթադրել է լրագրողը:

Սալլինենը կարծում է, որ Զելենսկին Հաագայում ՆԱՏՕ-ի գագաթնաժողովն ավելի կարևոր է համարում, քան Վաշինգտոնում անհաջող այցը:

Ըստ նրա, սա ավելի շուտ Զելենսկու զիջումն է ԱՄՆ-ին, քանի որ վերջին ժամանակաշրջանում Ուկրաինան դարձել է բազմաթիվ սուր հայտարարությունների թեմա, որոնց մեծ մասը հօգուտ Կիևի չէ:

ՆԱՏՕ-ի գագաթնաժողովը տեղի է ունենում հունիսի 24-25-ը Հաագայի կոնգրեսների շենքում: Մի քանի օր առաջ Politico թերթը գրել էր, որ Զելենսկին դժվար թե այս ֆորումից նոր խոստումներ ստանա արևմտյան գործընկերներից:

Թերթի աղբյուրի խոսքով, քանի որ ԱՄՆ-ից լրացուցիչ օգնություն չի սպասվում, իսկ հատկացված միջոցները սպառվում են, Ուկրաինայի ղեկավարությունը փորձում է Դոնալդ Թրամփից ստանալ հավաստիացում, որ ԱՄՆ-ն թույլ կտա Ուկրաինային և Եվրոպայի դաշնակիցներին ամերիկյան զենք գնել:

Թրամփը փետրվարի 28-ին Սպիտակ տանը կոշտ քննադատել էր Զելենսկուն, երբ վերջինս ժամանել էր Ուկրաինայի հանքային ռեսուրսների համատեղ յուրացման համաձայնագիր ստորագրելու: Ամերիկյան նախագահը պահանջել էր, որ Ուկրաինայի ղեկավարը համաձայնի հրադադարին և դադարի քննադատել ՌԴ նախագահ Վլադիմիր Պուտինին: Axios պորտալը, հղում կատարելով իր աղբյուրներին, նշել էր, որ Թրամփը նեղացած էր նաև նրանից, որ Զելենսկին բիզնես կոստյում չէր հագել:

ԱՄՆ փոխնախագահ Ջեյ Դի Վենսը Զելենսկուն անվանել է «ոչ երախտագետ ագիտատոր», երբ վերջինս փորձել էր արդարացնել իր քայլերը, մեղադրել Ռուսաստանին և նույնիսկ սպառնալ Ամերիկային՝ ասելով, որ նրանք կզգան պատերազմի հետևանքները, չնայած օվկիանոսով բաժանված լինելուն: Արդյունքում ուկրաինական պատվիրակությունն ստիպված էր հեռանալ Սպիտակ տնից, և համաձայնագիրը չստորագրվեց: Հետագայում Զելենսկին փորձել էր ներողություն խնդրել՝ ասելով, որ ափսոսում է տեղի ունեցածի համար, և հայտարարել էր, որ պատրաստ է հնարավորինս շուտ բանակցություններ սկսել: