ՄՈՍԿՎԱ, 23 հունիս – ԱՄՆ-ի նախագահ Դոնալդ Թրամփը չի ցանկանում ռազմական գործողությունների սրման Մերձավոր Արևելքում, սակայն պատրաստ է ուժեղացնել Վաշինգտոնի ռազմական մասնակցությունը, եթե դա անհրաժեշտ լինի։ Այս մասին հաղորդում է CNN հեռուստաալիքը՝ հղում կատարելով Սպիտակ տան բարձրաստիճան պաշտոնյայի։

Ավելի վաղ Իրանի զինված ուժերը հայտնել էին, որ Իրանը հրթիռային հարված է հասցրել ԱՄՆ-ի ռազմակայանին Կատարում։

«Թրամփի վարչակազմը սպասում էր, որ Թեհրանը կպատասխանի ԱՄՆ-ի՝ անցած շաբաթվա վերջին Իրանի միջուկային օբյեկտներին հասցրած հարվածներին, և նախագահը չի ցանկանում ավելի մեծ ռազմական ներգրավվածություն տարածաշրջանում… Սակայն Թրամփը պատրաստ է ուժեղացնել ԱՄՆ-ի ռազմական միջամտությունը, եթե դա պահանջվի», – նշվում է հաղորդագրության մեջ։

ԱՄՆ-ն 22 հունիսի գիշերը հարվածներ է հասցրել Իրանի երեք միջուկային օբյեկտներին՝ Նատանզում, Ֆորդոյում և Իսֆահանում։ Վաշինգտոնի խոսքով՝ հարձակումը նախատեսված էր Իրանի միջուկային ծրագիրը ոչնչացնելու կամ զգալիորեն թուլացնելու համար։

ԱՄՆ-ի նախագահ Դոնալդ Թրամփը նշել է, որ Թեհրանը պետք է համաձայնի «ավարտել այս պատերազմը», հակառակ դեպքում Իրանին ավելի լուրջ հետևանքներ են սպասվում։ Միևնույն ժամանակ, ԱՄՆ-ի փոխնախագահ Ջեյ Դի Վենսը, Իրանի կողմից «վայրագ և հանցագործ» անվանված հարվածներից հետո, հայտարարել է, որ ԱՄՆ-ը պատերազմի մեջ չէ Իրանի հետ։

Իրանի արտաքին գործերի նախարար Աբբաս Արակչին նշել է, որ «դիվանագիտության դուռը միշտ պետք է բաց լինի, բայց հիմա… դա ճիշտ պահը չէ»։ Նրա խոսքով՝ հենց ԱՄՆ-ն է դավաճանել դիվանագիտությանը։ Իրանը կձեռնարկի բոլոր միջոցները՝ պաշտպանելու իր անվտանգությունն ու երկրի շահերը։

Իրանի ատոմային էներգիայի կազմակերպությունը հայտարարել է, որ Իրանի միջուկային արդյունաբերության զարգացումը չի կանգ առնի։

ԱՄՆ-ի հարձակումը բացասական արձագանք է առաջացրել միջազգային հարթակում։ ՄԱԿ-ի գլխավոր քարտուղար Անտոնիու Գուտերեշը ԱՄՆ-ի հարվածները անվանել է վտանգավոր սրման քայլ տարածաշրջանում և ուղղակի սպառնալիք միջազգային խաղաղությանն ու անվտանգությանը։

Ռուսաստանը կտրուկ դատապարտել է ԱՄՆ-ի հարվածները Իրանի միջուկային օբյեկտներին՝ դրանք համարելով միջազգային իրավունքի, ՄԱԿ-ի կանոնադրության և Անվտանգության խորհրդի բանաձևերի կոպիտ խախտում։ Մոսկվան ՄԱԿ-ի Ատոմային էներգիայի միջազգային գործակալությունից (ՄԱԷԳ) ակնկալում է անաչառ արձագանք։ ԱՄՆ-ի գործողությունները դատապարտել են նաև Կուբան և Չինաստանը։