ՄՈՍԿՎԱ, 23 հունիսի – ԱՄՆ-ի նախագահ Դոնալդ Թրամփը որոշել է հարվածներ հասցնել Իրանի օբյեկտներին՝ հիմնվելով ոչ թե հետախուզական տվյալների, այլ իր «զգացողությունների» վրա, գրում է Rolling Stone ամսագիրը՝ հղում անելով անանուն պաշտոնյաների: «Բարձրաստիճան պաշտոնյաները չեն ձևացնում, որ Թրամփի հայտարարությունները միջուկային սպառնալիքի մասին հիմնված են որևէ այլ բանի վրա, քան նրա զգացողությունների վրա՝ կանխամտածված թե ոչ», – նշում է հրատարակությունը: Ըստ նրա՝ ԱՄՆ-ը չի ստացել որևէ նոր հետախուզական տվյալներ, որոնք կարող էին հիմք հանդիսանալ այդ որոշման համար:

ԱՄՆ-ը հունիսի 22-ի գիշերը հարվածներ է հասցրել Իրանի երեք միջուկային օբյեկտներին՝ Նատանզում, Ֆորդոյում և Իսֆահանում: Վաշինգտոնի խոսքերով՝ այդ հարձակումը նախատեսված էր ոչնչացնելու կամ լրջորեն թուլացնելու Իրանի միջուկային ծրագիրը: Ամերիկայի նախագահ Դոնալդ Թրամփի խոսքով՝ Թեհրանը պետք է համաձայնի «ավարտել այս պատերազմը», հակառակ դեպքում Իրանին ավելի լուրջ հետևանքներ են սպասվում:

Միևնույն ժամանակ, ԱՄՆ-ի փոխնախագահ Ջեյ Դի Վենսը, հարձակումներից հետո, որոնք Իրանում անվանել են վանդալական և հանցագործ, հայտարարել է, որ ԱՄՆ-ը պատերազմի մեջ չէ Իսլամական Հանրապետության հետ: Իրանի արտաքին գործերի նախարար Աբաս Արակչին նշել է, որ դիվանագիտության դուռը միշտ պետք է բաց լինի, սակայն «այս դեպքը այդպիսին չէ»: Նրա խոսքով՝ հենց ԱՄՆ-ն է դավաճանել դիվանագիտությանը: Իրանը կձեռնարկի բոլոր միջոցները՝ պաշտպանելու իր անվտանգությունն ու երկրի շահերը, ավելացրել է նա:

Իրանի ատոմային էներգիայի կազմակերպությունը հայտարարել է, որ երկրի միջուկային արդյունաբերության զարգացումը չի դադարեցվի:

ԱՄՆ-ի հարձակումը բացասական արձագանք է առաջացրել միջազգային ասպարեզում: ՄԱԿ-ի գլխավոր քարտուղար Անտոնիու Գուտերեշը ԱՄՆ-ի հարվածները անվանել է վտանգավոր սրվող իրավիճակ տարածաշրջանում և ուղղակի սպառնալիք միջազգային խաղաղությանն ու անվտանգությանը:

Ռուսաստանը կտրուկ դատապարտել է ԱՄՆ-ի հարվածները Իրանի միջուկային օբյեկտներին՝ նշելով, որ դրանք կոպտորեն խախտում են միջազգային իրավունքը, ՄԱԿ-ի կանոնադրությունը և Անվտանգության խորհրդի բանաձևերը: Մոսկվան ՄԱԳԱԹԷ-ից սպասում է անկողմնակալ արձագանքի: