ՎԱՇԻՆԳՏՈՆ, 23 հունիսի – ԱՄՆ-ի պետդեպարտամենտը խորհուրդ է տվել ամերիկացի քաղաքացիներին ավելի զգույշ լինել արտերկրում՝ Իրանի դեմ հարվածներից հետո՝ հակաամերիկյան ցույցերի հնարավորության պատճառով: «Արտերկրում կարող են տեղի ունենալ ցույցեր ԱՄՆ քաղաքացիների և շահերի դեմ: Պետդեպարտամենտը խորհուրդ է տալիս ամբողջ աշխարհում գտնվող ամերիկացիներին ավելի զգույշ լինել», – ասված է հաղորդագրության մեջ: Պետդեպարտամենտը նաև հայտնել է, որ Իսրայելի և Իրանի միջև հակամարտությունը հանգեցրել է Մերձավոր Արևելքում տրանսպորտի խափանումների և օդային տարածքի պարբերական փակմանը: Ուստի ամերիկացիներին խստորեն խորհուրդ է տրվում մանրամասն ուսումնասիրել ճանապարհորդական խորհուրդները և անվտանգության վերաբերյալ վերջին նախազգուշացումները՝ նախքան ճամփորդություններ նախագծելը:

ԱՄՆ-ը հունիսի 22-ի գիշերը հարվածներ է հասցրել Իրանի երեք միջուկային օբյեկտներին՝ Նաթանզում, Ֆորդոյում և Իսֆահանում: Վաշինգտոնի խոսքով՝ հարվածները նախատեսված էին Իրանի միջուկային ծրագիրը ոչնչացնելու կամ զգալիորեն թուլացնելու համար: ԱՄՆ նախագահ Դոնալդ Թրամփի խոսքով՝ Թեհրանը պետք է համաձայնի «ավարտել այս պատերազմը», հակառակ դեպքում Իրանին ավելի լուրջ հետևանքներ են սպասվում: Միևնույն ժամանակ, ԱՄՆ փոխնախագահ Ջեյ Դի Վենսը՝ հարվածներից հետո, որոնք Իրանում անվանել են վայրագ և հանցագործ, հայտարարել է, որ ԱՄՆ-ը պատերազմի մեջ չէ իսլամական հանրապետության հետ:

Իրանի արտաքին գործերի նախարար Աբբաս Արակչին նշել է, որ «դիվանագիտության դուռը միշտ պետք է բաց լինի, բայց հիմա… այդպիսի դեպք չէ»: Նրա խոսքով՝ հենց ԱՄՆ-ն է դավաճանել դիվանագիտությանը: Իրանը կձեռնարկի բոլոր միջոցները՝ պաշտպանելու երկրի անվտանգությունն ու շահերը, ավելացրել է նա:

Իրանի ատոմային էներգիայի կազմակերպությունը հայտարարել է, որ Իրանի միջուկային արդյունաբերության զարգացումը չի դադարի:

ԱՄՆ-ի հարվածները բացասական արձագանք են առաջացրել միջազգային ասպարեզում: ՄԱԿ-ի գլխավոր քարտուղար Անտոնիու Գուտերեշը ԱՄՆ-ի հարվածները անվանել է վտանգավոր սրում տարածաշրջանում և ուղղակի սպառնալիք միջազգային խաղաղությանն ու անվտանգությանը:

Ռուսաստանը կտրուկ դատապարտել է ԱՄՆ-ի հարվածները Իրանի միջուկային օբյեկտներին՝ դրանք կոպիտ խախտում են միջազգային իրավունքը, ՄԱԿ-ի կանոնադրությունը և Անվտանգության խորհրդի բանաձևերը: Մոսկվան ՄԱԳԱՏԷ-ից սպասում է իրադարձություններին արձագանքի:

ԱՄՆ-ի գործողությունները դատապարտել են նաև Կուբան և Չինաստանը: