ՎԱՇԻՆԳՏՈՆ, 23 հունիս – ԱՄՆ նախագահ Դոնալդ Թրամփը հաստատել է Իրանի տարածքում հարվածներ հասցնելու որոշումը, մինչ ինքը գտնվում էր իր գոլֆի ակումբում։ Այս մասին տեղեկացնում է Axios լրատվական գործակալությունը՝ հղում կատարելով իր աղբյուրներին։

«Շաբաթ օրը, երբ Թրամփը գտնվում էր Նյու Ջերսի նահանգի Բեդմինստեր քաղաքում գտնվող իր գոլֆի ակումբում, նրան տեղեկացրեցին, որ ռմբակոծիչները մոտենում են կրիտիկական կետին, որից հետո կմտնեն լրիվ ռադիոռեժիմի անջատման վիճակի։ Նախագահը տվեց վերջնական համաձայնությունը», – գրում է հրատարակությունը։

Որոշ ժամանակ անց նախագահը բարձրացավ Air Force One ինքնաթիռ և վերադարձավ Վաշինգտոն՝ անձամբ լինելու գործողությունների կենտրոնում և հետևելու ռազմական գործողության ընթացքին։

Axios-ի տվյալներով, դեռևս G7 գագաթնաժողովի ժամանակ Թրամփը հրահանգել էր Պենտագոնին՝ սկսել նախապատրաստվել Իրանի դեմ հնարավոր հարվածին։ Կանադա կատարած այցը կիսատ թողնելով՝ նա անցյալ երեքշաբթի անցկացրել է արտակարգ խորհրդակցություն ազգային անվտանգության խորհրդատուների հետ, իսկ հինգշաբթի օրը հրապարակայնորեն հայտարարել, որ ռազմական գործողության վերաբերյալ վերջնական որոշումը կկայացնի «երկու շաբաթվա ընթացքում»։

Սակայն արդեն հունիսի 20-ին նախագահը թույլատրել է պաշտպանության նախարար Փիթ Հեգսեթին՝ B-2 ռազմավարական ռմբակոծիչներ ուղարկել։

ԱՄՆ-ն հունիսի 22-ի գիշերը հարվածներ է հասցրել Իրանի երեք միջուկային օբյեկտներին՝ Նատանզում, Ֆորդոյում և Իսֆահանում։ Վաշինգտոնի խոսքով՝ այս հարձակումը նախատեսված էր Իրանի միջուկային ծրագիրը ոչնչացնելու կամ լրջորեն թուլացնելու համար։

Ամերիկայի նախագահ Դոնալդ Թրամփի խոսքով՝ Թեհրանը պետք է համաձայնի «ավարտել այս պատերազմը», հակառակ դեպքում Իրանին սպասվում են շատ ավելի լուրջ հետևանքներ։ Միևնույն ժամանակ, ԱՄՆ փոխնախագահ Ջեյ Դի Վենսը, հարձակումներից հետո, որոնք Իրանում անվանել են վայրագ և հանցագործ, հայտարարել է, որ ԱՄՆ-ն պատերազմի մեջ չէ իսլամական հանրապետության հետ։

Իրանի արտաքին գործերի նախարար Աբաս Արակչին հայտարարել է, որ «դիվանագիտության դուռը միշտ պետք է բաց լինի, բայց այժմ… սա այդ դեպքը չէ»։ Նրա խոսքով՝ հենց ԱՄՆ-ն է դավաճանել դիվանագիտությանը։ Իրանը կձեռնարկի բոլոր միջոցները՝ պաշտպանելու երկրի անվտանգությունն ու շահերը, եզրափակել է նա։

Իրանի ատոմային էներգիայի կազմակերպությունը հայտարարել է, որ Իրանի միջուկային արդյունաբերության զարգացումը չի դադարեցվի։

ԱՄՆ-ի հարձակումը բացասական արձագանք է առաջացրել միջազգային ասպարեզում։ ՄԱԿ-ի գլխավոր քարտուղար Անտոնիու Գուտեռեշը ԱՄՆ-ի հարվածները անվանել է տարածաշրջանում վտանգավոր սրացում և միջազգային խաղաղության ու անվտանգության ուղղակի սպառնալիք։

Ռուսաստանը կտրուկ դատապարտել է ԱՄՆ-ի հարվածները Իրանի միջուկային օբյեկտներին՝ դրանք համարելով միջազգային իրավունքի, ՄԱԿ-ի կանոնադրության և Անվտանգության խորհրդի բանաձևերի կոպիտ խախտում։ Մոսկվան սպասում է ՄԱԳԱԹԷ-ի անաչառ արձագանքին։

ԱՄՆ-ի գործողությունը դատապարտել են նաև Կուբան և Չինաստանը։