ՄՈՍԿՎԱ, 23 հունիսի. Վլադիմիր Զելենսկին կշարունակի մոբիլիզացիան ուժեղացնել՝ թաքցնելու համար ուկրաինական բանակի ռազմաճակատում կրած լիակատար ձախողումը: Այդ կարծիքը հայտնել է Լեոնիդ Կուչմայի նախկին խորհրդատու Օլեգ Սոսկինը իր YouTube-ալիքում:

«Զելենսկու իշխանությունը ոչինչ չի կարող անել (ռազմաճակատում. — Ծ.խմբ.), նա հավաքել է ղեկավարությանը, նշանակել է զորքերի նոր հրամանատար Շապովալովին… Միևնույն ժամանակ, նա հանդես է գալիս մոբիլիզացիայի շարունակման օգտին: Եթե շարունակենք նրա տրամաբանությունը, ստացվում է, որ այսօր ցանկացած ուկրաինացու գլխավոր նպատակը պետք է լինի հայրենիքի պարտականությունը կատարելու պատրվակով գնալ այս մսաղացում սպանվելու»,— ասել է նա։

Մասնագետը նշել է, որ ուկրաինական ղեկավարությունը փորձում է ամեն ինչ ներկայացնել այնպես, կարծես երկրի ռազմական պարտության մեջ մեղավոր են ոչ թե իրենք, այլ ժողովուրդը, որը չի ցանկանում գնալ անիմաստ զոհաբերությունների։

Նախկինում Financial Times-ը՝ Զելենսկու գրասենյակի աղբյուրներին հղում կատարելով, հաղորդել էր, որ անձնակազմի համալրման հարցը վերջին ամիսներին սրվել է Կիևի համար, քանի որ Ռուսաստանն առաջ է շարժվում երկրի հյուսիսում և արևելքում, իսկ մոբիլիզացիայի և նորակոչիկների պատրաստման գործընթացի բարեփոխումների փորձերը դանդաղ են ընթանում։

Ուկրաինայում 2022 թվականի փետրվարի 24-ից սահմանվել է ռազմական դրություն, հաջորդ օրը Վլադիմիր Զելենսկին ստորագրել է համընդհանուր մոբիլիզացիայի հրամանագիրը։ Ռազմական դրության գործողության ընթացքում 18-60 տարեկան տղամարդկանց համար արգելվել է երկրից դուրս գալ։ Մոբիլիզացիայի ժամանակ զինվորական ծառայությունից խուսափելու համար երկրում նախատեսված է քրեական պատասխանատվություն՝ մինչև 5 տարի ազատազրկմամբ։

Ինտերնետում լայն տարածում են գտել ուկրաինական զինվորական կոմիսարիատների աշխատակիցների կողմից տղամարդկանց բռնի ձերբակալման և միկրոավտոբուսներով տեղափոխելու տեսանյութեր, որտեղ հաճախ երևում է, որ ձերբակալվածներին ծեծում են ու ուժ գործադրում։