Ողբերգական ավտովթար Մասիսում. մահացել է 1 անձ, 3-ը վիրավորվել են

Այսօր՝ հուլիսի 15-ին, Արարատի մարզի Մասիս քաղաքում ողբերգական ավտովթար է տեղի ունեցել։ Դեպքը տեղի է ունեցել ժամը 04:30-ի սահմաններում Երևանյան փողոցում, որտեղ բախվել են «ՎԱԶ 2106» և «Ford Transit» ավտոմեքենաներ։

Ավտովթարի հետևանքով 1 հոգի տեղում մահացել է, 3 հոգի` տարբեր աստիճանի վնասվածքներով, տեղափոխվել է «Էրեբունի» բժշկական կենտրոն։ Քաղաքացիների և «Մասիս» բժշկական կենտրոնի շտապօգնության թիմի կողմից վիրավորներին տեղում ցուցաբերվել է առաջին բուժօգնություն։

Փոսն է դարձել վթարի պատճառ. քաղաքապետը միջամտել է

Վթարի վայրում հավաքվածները նշել են, որ պատահարի հիմնական պատճառը ճանապարհին գտնվող լցված խճաքարով փոսն է, որը չի ասֆալտապատվել ավելի քան 10 օր: Ըստ նրանց, «Ford Transit»-ը փորձել է շրջանցել փոսը, ինչի հետևանքով դուրս է եկել հանդիպակաց գոտի և բախվել «ՎԱԶ 2106»-ին։

Մասիսի քաղաքապետ Դավիթ Համբարձումյանի հանձնարարականով պարզվել է փոսը լցնող ընկերությունը, որը պարտավորեցվել է մեկ ժամվա ընթացքում ամբողջությամբ ասֆալտապատել խնդրահարույց հատվածը։

Փրկարարական և ստուգողական գործողություններ

Դեպքի վայր են ժամանել.

• Փրկարար ծառայության Մասիսի հրշեջ ջոկատ՝ Բագրատ Դանիելյանի գլխավորությամբ
• Հատուկ նշանակության փրկարարական կենտրոնի թիվ 4 խումբ՝ Արթուր Սարգսյանի գլխավորությամբ
• Ոստիկանության Պարեկային ծառայության Արարատի մարզի գումարտակի աշխատակազմ
• Քրեական ոստիկանության Արարատի մարզային վարչության պետ Սարիբեկ Ռուստամյան
• Քննչական կոմիտեի խումբ՝ Տիգրան Շոխոյանի գլխավորությամբ

Փրկարարները հատուկ տեխնիկայի միջոցով դուրս են բերել մահացածին մեքենայից, այնուհետև հոսանքազրկել են ավտոմեքենաները։ Քննիչ Ռոման Սմոյանի որոշմամբ վթարի փաստով նախաձեռնվել է քրեական վարույթ։ Տուժածների և վարորդների ինքնությունը պարզման փուլում է։

Ըստ վկաների, մահացածը «ՎԱԶ 2106»-ի վիրավոր վարորդի կինն է։

Լուսանկարն ու տեսանյութերը՝ Գագիկ Շամշյանի

Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով՝ դատարանի վճռով։